Ka philh kho lo. Malaysia ah Laimi a thimi kan tam ngai. Cucaah Laimi pakhat nih ca a rak tial i, "Malaysia ah a luangmi Laimi mitthli hi khap riat bel nih a tlum ti lai lo ee" tiah a rak ti.
Hpakanh i a luangmi Kawlram minung mitthli chinchin hi cu khap riat bel tam tuk donh ah aa tlum ding a ti lo chin chin lai. Zeicatiah Hpakant i lunghrin cawhnak lungkhur hi himbawmnak (safety) zeihmanh a um tuk lo. A min hi a tlawm ti lo. Mithi hi an tlawm ti lo. Nunnak hi, Kachin rampi hmanh nih a cawk khawh tung lo? Zeica dah hi lunghrin lungkhur ah hin an nunnak hi mah tluk lawmmam in an i sian hnga timi ruah ding a si cang.
Nizan zong ah Hpakant ah lunghrin lungkhur a cim. Vawlei kau taktak a min. Cucaah minung 200 hrawng an i taap ti a si. Thawngpan a phunphun a chuak. A cheu nih minung 103 an thi; a cheu nih 123 an ti. A cheu nih 150 ti a si.
Mi pakhat nih cun "Lungkhur chung ah a cheu cu an i taap le chuah khawh le chanh khawh an si lo. An au thawng cu kan theih ko hna" tiah a ti.
 |
| Hpakant mithi mi hna ruak |
Hpakant lunghrin lungkua ah hin, Tuluk le Kawl company tampi an lut. 2014 ah hi Hpakant lunghrin lungkhur in $31 billion man bak lunghrin a chuak ti a si. Hi ka hi vawleicung lunghrin lungkhur ngan bik a umnak a si. Hpakant hi Yangon in meng 950 a hla. Yangon in siseh, Kawlram khua zakip in lungcawh ah an ra hna. Laimi zong a kalmi tampi an um. A thimi zong an tlawm ti lo. All Chin Societies Yangon nih an tialnak ah cun, Chin mi zong pahnih an thi ve ti a si.
Tu tan Hpakant lunghring khur a cimmi ah hin, minung ruak tam ngaite an char cang. An kawl cuahmah lio zong a si rih. Minung zeizat ciah dah an thi timi hi an thei kho te hnga dek maw?
Lungkhur cawhnak ah hin, lungkhur minh hi a tlawm ti lo. Maisho ah kan rak kal lio zong ah lungkua thuk taktak ah ka rak lut. Cu ka ah a kan chimhmi cu, lungkhur lutmi kha an luhnak kua nih a cimhtak hna le an chuak kho ti lo i a thi tiah an rak ti.
Lung kan cawhnak hmun pakhat cu lung a rak chuak ngai. Mah cu thlang deuh ah lung lian taktakpi aa khangmi a um. Cu lunglian taktak pi cu a ho hmanh nih an co lo. An chimnak ah, mah lung lianpi tang ah hin, lung tam tuk a rak chuak. Lung thatha a rak chuak. Voikhat cu an cawh lio ah, lungvar cawtu Tuluk nu mirum kha mitpurh ah a va lut i a va zoh ve. Vanchiat ee tiah a va zoh lio ah, cu lungkhur cu a min i, mah lungpi nih hin a cimh hnawh hna. Minung 18 tluk an thi tiah an rak ti bal. Lung a lianh tuk caah le cawh ding ah tih a nun tuk caah an hlai kho ti hna lo. A cawh zong an co ngam ti lo ti a si. Mah lung lianpi tang hi cawh ahcun cu Tuluk mirum nu nih aa kenmi lung hmanh hi thawng tam tuk man a si lai tiah an rak ti tawn.
Maisho zong ah lung nih a kan rilh hrulh. Ralkap nih a kan thah hrulh. Ralkap le tapung karah kan rak i tenh. Harnak tampi kan tong. Thi dengmang in lung kan co. Vawlei kan phur. Vawlei kan tawl. Thi dengmang in kan um caan a sum theu. Voikhat hna cu ka zam manh le a si. Kan lungkhur a min le ka per manh nain, ka keng hi vawlei min mi nih a ka huai manh. Maisho ahcun thih hi zei rek lo te a si.
Tu tan Hpakant thimi tampi ka hmuh tik ah, Maisho kan sining le tonmi kha mitthlam ah a cuang. Ka philh kho lo. Dam tein kan kirmi cungah Pathian lawmh lo awk a tha lo. Rak thih khawh tuk ding kan rak si cio ko.
Tuluk nih an timi cu "Kan nih cu thih kan tih lo. Sifah tu kan tih" an ti. Cucaah Maisho zong ah siseh, Hpakant zong ah siseh thih tih lo bak in, rian an tuan taktak. An mah zong a thimi ah um ve ko lai nain, Kawlrammi lungcotu pawl hrimhrim hi lungvar mansung ruangah an nunnak mansung a hlomi an tam tuk cang.
Hi pin ah minung zeizat nunnak dek a liam rih te lai? Hi pin ah Kawlram minung mitthli hi khap riat bel zeizat remruam dek Hpakant ah a luang than rih te lai? Hihi kan sifah tuk ca maw a si? Rum kan duh tuk bia dah a si? Ruah ding tampi a um ko.
Hi vawleicung rumnak le suingun kan kawl lio ah, hihi ruat u sih. "Minung nih hin hi vawleicung pumpi hmanh hi co sehlaw a nunnak a sungh tung ah zeidah a thahnem? Minung nih hin Hpakant lung vialte co ko hmanh sehlaw, a nunnak a va loh tung ahcun zeidah a thahnem hnga?"